ភ្នំពេញ៖ រយៈពេល ៤ខែ ឆ្នាំ២០២៣ អគ្គនាយកដ្ឋានពន្ធដារប្រមូលពន្ធអាករគ្រប់ប្រភេទ បានចំនួន ១ ៥៩០,៧៥ លានដុល្លារ ស្មើនឹង ៤៤,៥៤ភាគរយនៃផែនការកំណត់ ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ ក្នុងនោះមួយផ្នែកនៃចំណូលពន្ធបានមកពីការ ប្រកាសនិងបង់ពន្ធលើប្រាក់ចំណូលក្នុងការិយបរិច្ឆេទ២០២២។

ចំណូលពន្ធអាកររយៈពេល ៤ខែ ត្រូវបានប្រកាសឱ្យដឹងនៅក្នុងកិច្ចប្រជុំបូកសរុបលទ្ធផលការងារគ្រប់គ្រងប្រមូលចំណូលពន្ធប្រចាំខែមេសា និងសម្រាប់រយៈពេល ៤ខែ ដែលធ្វើឡើងនៅថ្ងៃទី១៨ ខែឧសភា ឆ្នាំ២០២៣។

គូសបញ្ជាក់ថា តាមផែនការកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ អគ្គនាយកដ្ឋានពន្ធដារ មានបេសកកម្មក្នុងការប្រមូលចំណូលពន្ធចំនួន៣ ៥៧១,៧០លានដុល្លារ កើនឡើង ២៦,៦៨ភាគរយ បើធៀបនឹងផែនការឆ្នាំ២០២២៕